Manchester United coachi, Oga Alex Ferguson go waka comot from dia wen dis season finish, an im de EPL champion dem, bin tok on Wednesday ontop dia internet.
Oga Ferguson na im don win tins pass since futbal start for England and hin go waka comot de club afta dem follow West Brom play for May 19. Dem say hin go enta Man United office now.
Wen hin dey yarn as hin wan comot so, Oga Ferguson tok say: "Dis tin wey I wan do so, I do tink am well, well. No be small matta. De time don reach."
"My main gbege be say make I conmot wen de whole club tanda gidigba like Olumo Rock and na so e be. Dis team wey win dis league so na helele, and na small pikin and paale dem dey inside, so e balance sef. Dis team fit dey still win many tins and our small pikin academy sef, tanda sotay, de road for front no get go-slow."
"Our training area na faya and our stadium, Old Trafford, na ogbonge futbal stadium for de whole world sef."
"As e be so, my belle sweet say I go still be director for de club plus I go dey helep dem do many tins. If I join de small, small tins wey I go dey so, my road for front na express."
"Meanwilly, I no go forget my family dem sef, bicos dia support na die. My wife, Cathy, don follow me from beginning and na she be de brain box for my whole work so."